၂၀၀၆-ခုနှစ်တွင် စတင်ဆောက်လုပ်ခဲ့ပြီး အလျား ၄၃၀ ပေ X အနံ ၃၅၆ ပေ X အမြင့် ၁၉ ပေ ၆ လက်မ နှင့် ကြမ်းခင်းဧရိယာမှာ ၇၅၀၉၆ စတုရန်းပေဖြစ်၍ စေတီတော်တောင်ဘက်အရပ်တွင် တည်ရှိပါသည်။ ခန်းမအနေဖြင့် အလျား ၂၀၀ ပေ X အနံ ၁၀၀ ပေ ရှိပြီး ဘုံအဆင့် ၅-ဆင့်အထိ အမြင့်အနေဖြင့် ၉၂ ပေရှိပါသည်။ နိုင်ငံတော်မှ ဦးစီးကျင်းပပြုလုပ်သော သာသနာတော်ဆိုင်ရာဘွဲ့တံဆိပ်တော် ဆက်ကပ် လှူဒါန်းပွဲအခမ်းအနား၊ နိုင်ငံတော်အကြီးအကဲနှင့် မိသားစုအမှူးပြုသော ဆွမ်း ဆက်ကပ်လှူဒါန်းပွဲ၊ ဝါဆိုသင်္ကန်းဆက်ကပ်လှူဒါန်းပွဲ၊ ကထိန်လျာသင်္ကန်း ဆက်ကပ် လှူဒါန်းပွဲအခမ်းအနားများနှင့် တရားပွဲများကို ကျင်းပပါသည်။ ဗိမာန်တော်အတွင်း၌ ဧည့်ပရိသတ် ၁၀၀၀ ဦး ဝင်ဆံ့ပါသည်။ သာသနာ့မဟာဗိမာန်တော်၏ အလှူရှင်မှာ ဦးတေဇ(ထူးထရေးဒင်းကုမ္ပဏီ)ဖြစ်ပါသည်။